विक्रम पाण्डे

समयको एउटा यस्तो चक्र हुन्छ, जहाँ निष्ठा र धैर्यको अग्निपरीक्षा लिइन्छ। जसरी मर्यादा पुरुषोत्तम रामले चौध वर्षको वनवासलाई गुनासो नगरी केवल कर्तव्यको मार्गमा बिताउनुभयो, त्यसरी नै २२ वर्षसम्म समाजको ऐना बनेर पत्रकारिताको कठिन यात्रा तय गर्नुभएका उत्तम पौडेल दाइको लागि यो चुनावी मैदान एउटा आधुनिक ‘अग्निपरीक्षा’ जस्तै थियो। आज कास्की क्षेत्र नम्बर २ का जनताले जुन ऐतिहासिक मतान्तरसहित उहाँलाई अनुमोदन गरेका छन्, यो केवल एक व्यक्तिको जित होइन—यो त सत्य, शालीनता र अटुट लोक-कल्याणकारी संकल्पको विजय हो।

महाभारतको युद्धमा भगवान् कृष्णले भन्नुभएको थियो— “कर्मण्येवाधिकारस्ते मा फलेषु कदाचन।” उत्तम दाइले पनि फलको चिन्ता नगरी केवल कर्मलाई पूजा मान्नुभयो। चुनावी दौडधुपका बीचमा अनेकौँ चुनौती र घेराबन्दीहरू नभएका होइनन्, तर उहाँ कहिल्यै विचलित हुनुभएन। उहाँमा मैले त्यो अद्भुत ‘संयम’ र ‘दृढता’ देखेँ, जुन विषम परिस्थितिमा पनि शान्त रहन सक्ने क्षमता राख्छ। विपक्षीका प्रहारलाई पनि मुस्कानले जित्न सक्ने उहाँको यो खुबीले नै आज कास्कीको हरेक घरको मन जितेको छ।

उहाँको कार्यशैली र उर्जा देख्दा लाग्थ्यो, उहाँ भित्र हनुमानको जस्तो अटल सेवाभाव र गति छ। जनताको घरदैलोमा पुग्दा होस् या समस्याको गाँठो फुकाउने रणनीतिक छलफलमा, उहाँको स्पष्ट भिजन र सबैलाई समेटेर लैजान सक्ने ‘चाणक्य’ जस्तो सुझबुझले नै आज घण्टीको आवाजलाई झन् गुञ्जायमान बनाएको छ। हिजोका दिनमा एउटा कलमको माध्यमबाट समाजका विकृति विरुद्ध लड्ने मान्छे, आज जनताको प्रत्यक्ष सेवक बनेर राष्ट्रिय राजनीतिको केन्द्रमा उभिनुभएको छ।

अबको यात्रा संसद्को रोस्टमदेखि राज्यको कार्यकारी तहसम्मको हो। जसरी राजा जनकले आफ्नो विद्वता र न्यायले मिथिलाको इज्जत बढाएका थिए, त्यसरी नै उत्तम दाइको बौद्धिकता, इमानदारी र अनुभवले अब देशको बागडोर सम्हाल्ने ठाउँमा आफ्नो बलियो उपस्थिति खोजेको छ। पार्टीले उहाँ जस्तो निष्कलङ्क र क्षमतावान् व्यक्तित्वलाई उचित जिम्मेवारी दिँदा त्यसले केवल एउटा क्षेत्र वा भूगोललाई मात्र होइन, सिंगो राष्ट्रलाई नै सही दिशा निर्देश गर्नेछ भन्नेमा दुई मत छैन।

कास्की-२ का मतदाताले देखाएको यो भरोसा र उहाँको व्यक्तित्वको यो ओजलाई अब देशले महसुस गर्नुपर्छ। एउटा यस्तो सारथी, जोसँग योजना पनि छ र त्यो कार्यान्वयन गर्ने इमान पनि। उत्तम दाइको यो यात्रा संसद्मा सुनिने आवाज मात्र नभई, सुशासनको एउटा नयाँ मानक बनोस्।